Poslovne vesti - Makedonija

Турски бизнисмени ќе инвестираат во Неготино

Откако Општина Неготино понуди на продажба градежни парцели, интересот за инвестирање расте од ден на ден.

Турски бизнисмени кои вчера се сретнаа со градоначалникот Ванчо Апостолов велат дека сакаат да купат земјиште на кое имаат намера да изградат стопански објект за откуп, преработка, складирање и дистрибуција на земјоделски производи. Турците најмногу се заинтересирани да инвестираат во земјоделските култури, пред се' во овоштарството и тоа преку отворање ладилник во областа „Илјадарка“ во Неготино.

Градоначалникот Апостолов вели дека со оваа инвестиција ќе се мотивираат земјоделците да им се посветат токму на оние земјоделски гранки кои ќе бидат во интерес на потенцијалните инвеститори.

Инаку, Општината нуди на продажба вкупно 6 градежни парцели од кои 3 се наменети за изградба на стопански комплекс за откуп, преработка, складирање и дистрибуција на земјоделски производи, а останатите 3 се за објекти од лесна индустрија.

Деновиве бизнисмени од Турција беа во посета и на општините Кавадарци и Росоман. Засега се знае само дека се заинтересирале за фабриката за преработка на овошје и зеленчук „Скок трејд“ која се наоѓа во Росоман.